Galiza Nova Pontedeume

Galiza Nova na Manifestación Nacional de apoio ao Pobo Palestino Alameda de Compostela día 18 ás 12:00 horas

2009-01-14T15:20:00.007Z

Galiza Nova como unha das organizacións convocantes acudirá á todalidade das mobilizacións que terán lugar exixindo o cese dos brutais ataques ao pobo palestino por parte do Estado imperialista de Israel.

Galiza Nova que xunto co BNG foi unha das primeiras organizacións en denunciar públicamente esta cuestión, asistirá a todas elas con material propio baixo o lema "Paz e Liberdade Para Palestina!".

Alén das mobilizacións comarcais e locais que se fixeron en toda Galiza (como foi o caso da nosa vila), tamén terá lugar unha manifestación nacional convocada para o domingo día 18 en Compostela.

A marcha sairá ás 12.00 horas da Alameda e percorrerá varias rúas de Compostela até chegar á Praza da Quintana, onde se ha ler un manifesto.

Deste xeito, é importante e necesario que todos e todas acudamos á esta manifestación xa que é necesario dar unha resposta unitaria e nacional á matanza palestina do sionismo en Gaza.

Galiza Nova co pobo Palestino!

Convención Electoral Nacional do BNG

2009-01-14T15:09:00.002Z

O vindeiro sábado 17 de xaneiro ás 18 horas no Pavillón do Restollal de Santiago de Compostela terá lugar a Convención Electoral Nacional do BNG.

Neste acto, o Bloque Nacionalista Galego presentará á sociedade a súa candidatura ás Eleccións Autonómicas 2009.

Se así o desexares podes acudir á convención. Haberá buses en cada unha das comarcas.

Galiza Nova e o BNG co pobo Palestino!

2009-01-14T14:55:00.003Z

Perante a situación que está a sofrer o pobo palestino – nomeadamente na franxa de Gaza – nos últimos días, a Asemblea Comarcal do BNG e de Galiza Nova queremos expresar publicamente:

1.- O rexeitamento rotundo aos bombardeos levados a cabo por parte do exército de Israel – neste momento con perto de 500 mortos nas últimas accións – e que veñen a evindenciar que o colofón á blocaxe perpetrada polo Estado de Israel contra o pobo de Gaza constitúe verdadeiramente un crime de guerra.

2.- Reiteramos – como así se fixo xá por medio da correspondente iniciativa parlamentar – a petición de que o Estado Español suspenda as relacións diplomáticas e económicas co Estado de Israel ata que non se poña fin á agresión militar e blocaxe que o mesmo está a perpetrar na franxa de Gaza.

3.- Solicitamos, asimesmo, que o Estado Español inste oficialmente ao cumprimento das reiteradas resolucións da ONU relativas á retirada israelí dos territorios ocupados; ao tempo que se demande, no marco das Nacións Unidas, o envío inmediato dunha misión de observación e interposición co fin de garantir a fin da blocaxe e da agresión militar.

4.- A Asemblea Comarcal do BNG e de Galiza Nova resolve, en liña cos apartados anteriores, remitir sendos escritos de condena da situación ao Presidente do Goberno Español, Ministerio de Asuntos Exteriores e Embaixada de Israel; ao tempo que transmitir a solidariedade e apoio á representación do pobo de Palestina en Galiza.

Palestina vencerá!

Éxito do I Campionato de Futbolín "Unha Nación, Unha Selección"!

2009-01-14T14:38:00.006Z

O I Campionato de Futbolín "Unha Nación, Unha Selección" organizado polas asembleas locais de Galiza Nova en Cabanas e Pontedeume, e que tivo lugar o venres día 26 de decembro no bar "El Griego" foi todo un éxito.

Un total de 16 parellas participaron deste campionato, pero foron máis as que quixeron inscribirse a última hora, ás que non puidemos acoller por razóns de organización.
Dado o éxito e interese mostrado pola mocidade da nosa vila e dos seus arredores, o vindeiro ano celebrarase unha nova edición na que teremos en conta estas peculiaridades para que todo o mundo que quixer poida participar.

Resultados

As parellas foron divididas mediante sorteo en catro grupos de catro parellas cada un. Clasificouse a primeira de cada grupo tras xogar unha liguiña. Os catro clasificados loitaron polo primeiro posto mediante eliminatorias.

Os vencedores desta edición foron Iago Castro e Fran Iglesias. Que son estes que estades a ver:

O segundo posto copáronno Raúl Calvo e Luís Tenreiro. Que son estes que estades a ver:

En terceiro lugar quedaron Carlos Cernadas e Damián Amado. Que son estes que estades a ver:

Sen máis, desde Galiza Nova Pontedeume só nos resta darvos as grazas polo voso interese e participación.

UNHA NACIÓN, UNHA SELECCIÓN!

Anótate no I Campionato de Futbolín “Unha Nación, unha selección!” que organiza Galiza Nova en Pontedeume

2008-12-15T09:28:00.004Z

Galiza Nova Pontedeume, en colaboración cos compañeiros e compañeiras de Cabanas, organiza o venres 26 de decembro ás 20:00 horas no bar “El Griego” da nosa vila o I Campionato de Futbolín “Unha Nación, unha selección!”.

O motivo deste campionato é ben sinxelo, non é outro que o de reclamarmos o dereito para que a selección da nosa nación: Galiza, poida competir a nível internacional, é dicir, nas competicións que organiza a FIFA, nin máis nin menos do que outras seleccións de nacións e rexións sen Estado, coma Gales, Escocia ou as Illas Féroe. Máis aínda, cando a imposibilidade xurídica non é insalvábel. A FIFA admitirá á nosa selección só con que a Federación Española de Fútbol levante o veto á participación das seleccións das nacións que hoxe configuran o Estado nas súas competicións.
Deste xeito, só unha decisión federativa da RFEF, nada máis (e nada menos) separa á nosa selección de competir no mundo, mais tamén nos separan os rexos mecanismos centralistas que o Estado Español engraxa cada día.
Por iso, e para visibilizar a nosa posición que mellor que facelo dunha forma lúdica e cun invento galego: o futbolín, do gran Alexandre de Fisterra.

- QUEN PODE PARTICIPAR?

Pode participar calquera persoa que así o desexar, sen límite de idade. Alén diso, a composición das parellas é libre, é dicir, os membros poderán ser dun mesmo sexo ou mixtas.

- COMO ANOTAR A MIÑA PARELLA?

Podes anotar a túa parella mandando un correo electrónico a unha das seguintes direccións:

gznovapontedeume@gmail.com ou galizanovacabanas@gmail.com

Onde deben constar os seguintes datos:

- Nome e Apelidos de cada membro da parella
- Un número de teléfono
- Unha dirección de correo electrónico

Tamén podes anotar a túa parella chamando a un dos seguintes teléfonos: 690 384 294 ou 654 666 558.

Os 2 euros que custa a inscrición será entregada o mesmo día do Campionato.

- QUE PREMIOS HAI?

1º Premio: 1 trofeo acreditativo de seren os vencedores do Campionato
2 entradas para o encontro da selección galega en Riazor
2 camisolas
2º Premio: 2 entradas para o encontro da selección galega en Riazor
2 camisolas
3º Premio: 2 entradas para o encontro da selección galega en Riazor
2 fundas “Galiza” para o móbil

Alén diso, haberá un agasallo para todos os participantes.

Sen máis, desde Galiza Nova de Pontedeume e Cabanas agardamos que te sumes a participar deste I Campionato de Futbolín “Unha Nación, unha selección!” para reclamarmos así os lexítimos dereitos da nosa Selección.

Vémonos o venres 26 de decembro ás 20:00 horas no bar “El Griego”!

Galiza Nova mobilizarase coa CIG contra a crise

2008-11-05T14:41:00.001Z

Galiza Nova que durante os seus vinte anos de existencia sempre defendeu a necesidade do cambio do actual modelo socioeconómico por outro máis xusto amosa o seu apoio á campaña posta en marcha pola CIG para denunciar aos responsábeis da actual situación da crise económica e as nefastas repercusións que as medidas tomadas polo goberno do Estado terán sobre as traballadoras e traballadores. Neste sentido Galiza Nova tamén secundará as manifestacións convocadas o 13 de novembro pola CIG en diferentes puntos do país. Velaquí as horas e os lugares:

A Mariña: Saída ás 19:30 da Praza Maior de Viveiro

A Coruña: Saída ás 20:00 horas da Praza da Palloza.

Ferrol: Saída ás 19:30 da Avenida de Esteiro, diante do sindicato.

Lugo: Saída ás 20:00 h da Ronda da Muralla, diante do sindicato.

Ourense: Saída, ás 20:00 h do pavillón dos Remedios.

Pontevedra: Saída ás 20:30 h da Praza da ferrería.

Santiago: Saída ás 20:00 h da Praza Roxa.

Vigo: Saída ás 20:00 da Vía Norte.

O BNG leva a cuestión das retencións do tráfico da nosa vila ao Congreso!

2008-10-14T10:21:00.005+01:00

A continuación recollemos a pregunta formulada a día 21 de abril do 2008 polo deputado do BNG Francisco Jorquera e remitida á Mesa do Congreso:

Os veciños de Pontedeume veñen reclamando dende fai anos unha solución ao problema das retencións de tráfico na N-651 ó seu paso pola vila. A iniciativa do BNG o Congreso dos Deputados xa se ten pronunciado en varias ocasións a favor de buscar unha solución que sexa o menos agresiva posible dende o punto de vista paisaxístico e medioambiental.A pesar distos antecedentes, o Ministerio de Fomento adxudicou o pasado 19 de febreiro á empresa Obras, Caminos y Asfaltos a construcción de dúas glorietas e sendos pasos subterráneos na N-651 ó seu paso por Pontedeume. En concreto, os traballos efectuaranse no kilómetro 20,3 da N-651: a primeira glorieta situarase no final da ponte que une Pontedeume e Cabanas, o mesmo lugar onde se construirán os pasos subterráneos, e a segunda fronte á estación de servicio do centro da localidade.O proxecto do Ministerio de Fomento ten sido criticado polos veciños por non ter en conta o patrimonio histórico de Pontedeume e pola grave afectación que provocaría nesta vila medieval.En concreto, os veciños acusan ó Ministerio de Fomento de non someter o proxecto a información pública para que os particulares e entidades interesadas poideran presentar alegacións.Ademáis, critican que non se teña encargado un estudo de impacto ambiental e outro estudo sobre restos arqueolóxicos á Dirección Xeral de Patrimonio da Xunta de Galiza, especialmente necesario para as obras dos pasos subterráneos.Tamén resulta moi cuestionable a construcción de túneles ó final da ponte de pedra, o que provocará un notable impacto paisaxístico. Por non falar dos problemas que os pasos subterráneos provocarán na rede de suministros de auga, o cableado eléctrico, os contedores subterráneos da Praza de España ou os colectores de augas residuais.En definitiva, a opción escollida por Fomento non é a mellor. Unha solución alternativa ó problema do tráfico rodado polo centro de Pontedeume pasaría pola construcción dun enlace coa autopista AP-9 na parroquia de Andrade, á altura do Vidrieiro, e establecer unha circunvalación libre de peaxe. Esta opción, que no seu día foi asumida polo entón Secretario Xeral de Infraestructuras, Emilio Pérez Touriño, permitiría dotar das conexións necesarias ó polígono industrial de Vidreiro, hoxe prácticamente ocupado.Ademáis, serviría para aliviar o elevado volume de tráfico que vai xerar a macrourbanización de MARTINSA-FADESA (1500 vivendas) e en xeral toda a "sobrecarga urbanística" de Miño. Neste sentido, hai que destacar que os concellos de Pontedeume e Miño teñen realizado xestións conxuntas ó respecto e a inmobiliaria MARTINSA-FADESA asumeu costear a maior parte da inversión na construcción do enlace de Vidreiro.Outra solución alternativa sería a liberalización da peaxe no tramo de autopista que une Fene e Campolongo.É por todo o que antecede que se presentan as seguintes preguntas:

-¿Coñece o Goberno o grave impacto paisaxístico e medioambiental que van provocar as obras que o Ministerio de Fomento está acometendo na N-651 á altura de Pontedeume?
-¿Ten sometido o proxecto a información pública durante ó menos un mes? En caso contrario ¿por que motivo?
-¿Por que non encargou o Ministerio un estudo de impacto ambiental?
-¿Non cre necesario o Goberno realizar un estudo que descarte a existencia de restos arqueolóxicos, necesario nunha vila medieval como Pontedeume?
-¿Ten encargado o Goberno dito estudo a Patrimonio?
-Dados os importantes problemas que poden provocar as obras dos túneis na infraestructura urbana da vila ¿Ten informado o Ministerio ó Concello de Pontedeume?
-¿Está disposto o Goberno a iniciar un diálogo cos veciños e o concello para buscar unha alternativa con menor impacto paisaxístico e medioambiental?
-¿Non cre o Goberno que a mellor alternativa pasa pola construcción do enlace de Vidrieiro?
-¿Non cre o Goberno necesario aplicar unha liberación da peaxe no tramo da autopista que une Fene e Campolongo, o que evitaría o problema do tráfico rodado da N-651 que atravesa o centro da vila?

O Feminismo pola Transformación Social!

2008-10-12T16:33:00.003+01:00

A Marcha Mundial das Mulleres, da que a Asemblea de Mulleres de Galiza Nova forma parte, celebra o seu VII Encontro Internacional na Galiza e convoca a unha mobilización masiva da sociedade galega de apoio aos proxectos de transformación social que aporta o Feminismo.

A manifestación terá lugar o domingo 19 de outubro en Vigo, con saída ás 12.00 horas da Praza do Concello e chegada na rúa do Areal preto da feira de soberanía alimentaria que organiza a propia Marcha Mundial das Mulleres.

Desde Galiza Nova animámosvos á participación nesta manifestación convocada pola Marcha Mundial das Mulleres.

Na defensa dos nosos dereitos laborais!

2008-10-02T18:08:00.000+01:00

A CIG convocou para o vindeiro martes sete concentracións simultaneas en todas as comarcas do país. O motivo desta convocatoria é a denuncia da ratificación polo Parlamento Europeo, das modificacións inseridaas na Directiva de Tempo de Traballo. Mediante estas modificacións xeneralizase entre outras gravísimas cuestións a posibilidade de ampliar a duración máxima da xornada laboral até 65 horas semanais. Desde a CIG denúnciase que esta directiva suporá unha grave perda de dereitos para a clase traballadora. Desde Galiza Nova apoiaremos estas mobilizacións na defensa dos nosos dereitos laborais.

CONCENTRACIÓNS

A Mariña: Ás 11:00 horas no concello de Cervo.

A Coruña: Ás 12:00 horas, diante da Subdelegación do Goberno.

Ferrol: Ás 12:00 horas diante do edificio da Xunta de Galiza.

Lugo: Ás 12:30 horas diante da Subdelegación do Goberno.

Ourense: Ás 11:30 diante do edificio sindical.

Pontevedra: Ás 12:30 horas diante da Subdelegación do Goberno.

Santiago: Ás 12:30 h na Praza de Galiza.

Vigo: Ás 12:00 horas, saída de diante do pavillón do Berbés.

O GOBERNO DE PONTEDEUME ESQUÉCESE DA MOCIDADE, DA LINGUA E DA CULTURA GALEGA TAMÉN NA FESTA DAS PERAS

2008-09-15T11:57:00.003+01:00

Galiza Nova de Pontedeume quérevos informar da nota de prensa enviada a todos os medios de ámbito nacional e comarcal sobre a política cultural e lingüística do goberno da nosa vila. A continuación ofrecémosvos o texto da nota de prensa:

Desde Galiza Nova, organización xuvenil do BNG, de Pontedeume poñémonos en contacto co seu medio para o informar do descontento que nos produce o programa das Festas das Peras, que se desenvolverán na nosa vila do sete ao once de setembro, así como a política cultural emanada do Concello.
Máis un ano o programa das Festas das Peras, festa tradicional en Pontedeume e que acolle a centos de visitantes, moitos deles xente nova, volve obviar sen ningún tipo de paliativos o aspecto musical pensado especialmente para a xuventude. Volve darse a casualidade de que a pesar da extraordinaria situación que vive a nosa música na nosa lingua canto á calidade como á variedade de estilos e do gosto que por ela hai na nosa vila, como se puido observar polo éxito do Concerto polo XX Aniversario de Galiza Nova que organizamos desde Galiza Nova Pontedeume xunto cos compañeiros de Cabanas, o noso Concello segue a deixala completamente de lado. Así, as únicas oportunidades que temos de escoitar grupos que canten na nosa lingua son iniciativas de entidades alleas ao Concello, como foi o "Vai de Camiño".
No que se refire á política cultural levada a cabo polo goberno local, a cargo do PP, temos que denunciar que se perdeu definitivamente a II Semana da Ciencia e a III Semana do Libro e da Lectura. Un feito que se produce, en grande medida, pola máis absoluta falta de vontade política de levar adiante estas actividades impulsadas desde o BNG no anterior mandato e deixándose de empregar, deste xeito, até 30.000 euros de subvencións achegados por diferentes consellarías.
Outra boa mostra da desidia canto á política cultural é a redución das actividades de lecer do Planet, que gozaban dun grande éxito entre a xuventude, sumado isto a unha nula Política de Normalización Lingüística.

Éxito do Concerto de Galiza Nova na vila!

2008-09-03T17:09:00.007+01:00

O pasado venres 22 celebramos o concerto do 20 aniversario de fundación da organización xuvenil do BNG.

As actuacións musicais dos grupos, ambos da nosa comarca, The Arradios, chegados dende San Sadurniño, e Arenga, de Pontedeume, animaron a toda a mocidade da nosa comarca e a todos aqueles que se achegaron até a Sala Coliseo para disfrutar da música dos dous grupos.

E como cabía esperar, non defraudaron. O público estivo todo o tempo que durou o concerto animado e participando activamente da festa. Mesmo houbo quen se animou a facer os coros! Escoitándose, ademais, durante boa parte do concerto os berros de "Galiza Nova, Galiza ceive!" ou "Galiza ceive, poder popular!"

Desde Galiza Nova Pontedeume agradecemos a toda a mocidade da comarca que se achegou ao concerto que este fose un éxito, e que supón o primeiro dos actos lúdicos e políticos cos que Galiza Nova celebra o 20 aniversario da súa fundación na comarca e no país.

Veñan máis 20 anos para a nosa organización!

Viva Galiza Nova, viva Galiza ceive!

Concerto 20 Aniversario Galiza Nova 22/08 ás 23:00h na Sala Coliseo (Pontedeume)

2008-08-09T10:29:00.004+01:00

Co gallo do 20 aniversario da nosa Organización, Galiza Nova de Pontedeume, xunto cos compañeiros de Cabanas, vimos de organizar un concerto para o celebrar.

Neste concerto, que terá lugar o venres día 22 de agosto ás 23:00 horas na Sala Coliseo (Pontedeume), contaremos coa presenza de dous grupos que cantan na nosa lingua e que son da nosa comarca. Os grupos son The Arradios (San Sadurniño) e Arenga (Pontedeume).

A entrada será gratuíta porque entendemos que para disfrutar da cultura, da boa música e para dar a coñecer a estes grupos a accesibilidade debe ser total.

Como xa fixemos desde que nos organizamos na vila, como anunciamos na nosa primeira entrada neste blog e como xa amosamos coa nosa intensa labor na Campaña de Lingua cando repartimos información nos centros de ensino da vila conseguindo achegar máis mocidade á manifestación en defensa do galego que tivo lugar o 18 de maio en Compostela, pegamos carteis por toda a vila e fixemos un mural nunha importante zona de paso dos mozos e mozas de Pontedeume: somos unha organización que se afasta da liña de actuación (ou desactuación mellor dito, porque a crítica destrutiva e improdutiva entre blogs non se pode considerar actuación) das demais organizacións políticas xuvenís que se manifesta nunha total inoperancia no que a presenza e traballo por e para a mocidade na nosa vila se refire.

Sen máis, recordámosvos que tedes unha cita o venres 22 de agosto ás 23:00h na Sala Coliseo coa música galega de The Arradios (San Sadurniño) e Arenga (Pontedeume) e con Galiza Nova:

ACODE E DISFRUTA!

Galiza Nova organiza un Acto de Homenaxe a Rosalía de Castro e Castelao

2008-07-21T12:00:00.001+01:00

Movámonos para conseguir un 25 de Xullo masivo!

2008-07-16T08:53:00.005+01:00

A activación da base social do nacionalismo é a clave para que Galiza poda enfrentar con garantías de éxito os retos que ten por diante: a consecución dun financiamento adecuado, a negociación do Novo Estatuto de Nación que xa ten Catalunya, o combate ás consecuencias dunha crise económica que se prevé longa e de moi difícil manexo, as próximas eleccións galegas... Sen base social, sen a movimentación do pobo, non é viábel nengún proxecto de vertebración do País, nengún proxecto de emancipación nacional. Os proxectos transformadores só se poden materializar se hai correspondencia entre a rúa e a organización política que vehiculiza esa pulsión de cambio, no noso caso de cambio galego. Isto é así desde as orixes do nacionalismo en Galiza. E débeo ser aínda moito máis agora. Porque é precisamente agora cando se dan as mellores condicións para o nacionalismo dar un salto cualitativo cara a adiante. É precisamente agora porque o nacionalismo dispón de ferramentas (nomeadamente a súa presenza no Goberno da nación) das que carecía outrora.

Sería un erro relaxar o traballo social. Ao contrario: agora fai máis falta que nunca.Este é o espírito co que o BNG e Galiza Nova enfrentou este ano a organización dos distintos actos que se nuclean arredor do Día da Patria Galega 08. Lonxe de calquer tentación rotineira, a dirección da Frente entendeu que este ano era preciso meter unha marcha máis e apostar forte polo Día da Patria Galega máis masivo da historia do nacionalismo.Esa aposta traduciuse na organización de máis de 200 actos previos ao 25 de Xullo por todas as vilas e cidades do País cunha intensa participación dos cuadros máis sobranceiros da formación nacionalista, desde os membros da Executiva Nacional, a comezar polo portavoz nacional, até os deputados e deputadas do Parlamento Galego e do Parlamento do Estado. O obxectivo, ambicioso, de reunir a máis de 40.000 persoas nos actos previos ao Día da Patria Galega 08 non é en absoluto caprichoso, senón que responde á convicción de que no País hai xa unha conciencia nacional suficientemente madura para enfrentar un desafío organizativo desta magnitude.

Agora é fundamental que todos e todas as militantes e simpatizantes de Galiza Nova poñan todo da súa parte para que os actos do 24 e o 25 de Xullo –lembrade que o Festigal, www.festigal.com comeza o 24 cunha programación dunha calidade tamén sen precedentes- rexistren unha asistencia masiva. Falar cos amigos e amigas, cos compañeiros e compañeiras do traballo, cos familiares, é imprescindíbel agora máis que nunca. O reclamo é verdadeiramente atraínte: a manifestación do 25 de Xullo terá desta volta dous roteiros simultáneos á súa chegada ao casco vello e vaise instalar unha pantalla xigante na Praza de Praterías para dar acomodo á xente que non dea accedido á Quintana. A maiores, o engado dun Festigal 08 que contará con actuacións musicais da potencia dun Pablo Milanés, un Berrogüetto ou Internacional Noise Conspiracy.

É básico que o 25 de Xullo Galiza emita unha clara mensaxe de orgullo nacional. O orgullo dun País que non é conformista, que non se queda na casa e que sae á rúa a defender os seus dereitos a ser dono do seu futuro.

Posicionamento do BNG sobre o Tratado de Lisboa

2008-06-26T16:44:00.004+01:00

Velaquí o posicionamento do BNG sobre o Tratado de Lisboa que contou co aberrante voto a favor do PSOE e do PP:

A) CUESTIÓNS PREVIAS:

As Cortes Xerais do Estado debaten o Tratado de Lisboa, asinado na capital portuguesa o 13 de decembro de 2007 polos Xefes de Estado ou de Goberno dos 27 estados membros da Unión. Este Documento modifica o Tratado da Unión Europea e o Tratado Constitucional da Unión Europea.
Este proceso realizado exclusivamente pola vía parlamentar, é froito dun acordo adoptado durante a Presidencia Alemana co que se pretende retomar a mal chamada “Constitución” Europea.
Ante este debate o BNG defende, en coherencia coas resolucións adoptadas na XI Asemblea Nacional (2003) e no Programa para as eleccións ao Parlamento Europeo (2004), unha posición, tendo en conta o contido do Tratado, contraria á ratificación do mesmo.

B) AS RAZÓNS DA OPOSICIÓN DO BNG Á RATIFICACIÓN DO TRATADO:

1. O deficit democrático
O procedemento seguido escapando do referendo, en base a diversos pretextos, revela o medo ao sentido de voto dos cidadáns europeos. Saben que o contido do “Tratado de Lisboa” é a copia da referida constitución europea, á que mudaron o nome para tentar de enganar á poboación europea, o que representa un auténtico fraude político.
No que atinxe á arquitectura institucional, o Tratado de Lisboa reforza os poderes da Comisión (o executivo da UE) en detrimento do Parlamento.
O empobrecemento da democracia tamén é visíbel na Carta dos Dereitos Fundamentais, máis restrinxida, aínda, que a estabelecida no Tratado Constitucional.
2. O deficit de soberanía: O esquecemento da europa dos pobos
O “Tratado de Lisboa”, esixe o respecto á “integridade territorial” de cada Estado, polo que a a plasmación práctica do dereito de autodeterminación queda impedido.
O “Comité das Rexións” ao sumo non pasa dunha cifra de “representantes rexionais” que expresan o peso político dos estados membros da Unión sen atender a articulación territorial e institucional de cada un deles conforme a criterios dunha mínima democracia.
O Tratado de Lisboa consolida unha estructura de poder baseada na combinatoria de estados xerarquizados, coa mudanza no procedemento de adopción de moitas decisións, que lle outorga aos estados centrais un papel determinante.
O proceso de construción da UE é a concreción en Europa da dialéctica mundialización-rexionalización, antitética ás formulacións do nacionalismo galego.
O Tratado de Lisboa representa un paso atrás no recoñecemento na esfera internacional da lingua galega. As únicas linguas oficiais son as dos estados, estabelecéndose unha división ou xerarquización entre as mesmas atendendo unicamente a criterios políticos administrativos. Isto é, o elemento para determinar a visibilidade dunha lingua é o Estado; é dicir, o corsé estatal determina a existencia ou non dun idioma.
3. Unha política económica ao servizo do capital
No contido do Tratado institucionalizase a Estratexia de Lisboa e o Pacto de Estabilidade insistindo nas políticas que están a ser practicadas, con consecuencias xa coñecidas: recortes nos salarios reais e nas pensións, menores investimentos nos servizos públicos e maiores ganancias para os grupos económicos.
Por outra banda, convén lembrar que, mália o que digan os defensores da UE, Galiza non recibiu tantos fondos europeos. Do total de recursos comunitarios destinados ao Estado Español, entre 1986 e 2006, a porcentaxe galega non pasou do 6%, inferior ao seu peso poboacional no conxunto do Estado.
O “Tratado de Lisboa” vai fixar competencias exclusivas ou compartidas cos Estados, socavando a capacidade de planificar ou intervir na economía pola diferentes nacións ou estados, o que fará inviábel que se poida enfrentar unha situación como a da actual crise económica ao servizo dos pobos e da maiorías sociais.
O Tratado vai deixar en mans da Comisión a política enerxética, a de transporte e a comercial común, o que afondará nas desigualdades rexionais no espazo comunitario.
4. Un retroceso nos dereitos sociais
O “Tratado de Lisboa” significa un novo avance no ataque aos dereitos laborais, poñendo en cuestión o despedimento sen causa xusta, a negociación colectiva ou a limitación horaria da xornada laboral, da que é claro exemplo a directiva que promove a ampliación da xornada laboral semanal a 65 horas.
O dereito ao traballo e ao emprego non existen, simplemente aparece o “dereito a traballar”. O dereito á protección social é substituído por un mero “dereito de acceso ás prestacións da seguranza social e aos servizos sociais”.
Por outra banda, o Tratado non recoñece o dereito ao aborto e á anticoncepción.
Así mesmo, a UE sitúase á cabeza do mundo en represión en materia de inmigración nunha dirección contraria aos dereitos humanos.
5. A concepción dunha europa subalterna
O Tratado de Lisboa non deixa dúbidas sobre a natureza do modelo europeo e do seu carácter subalterno e complementario ao bloque norteamericano, actuando como unha mera sucursal do proxecto político estadounidense.
Un exemplo palpábel deste papel subalterno é a nova formulación que se fixa en Lisboa, que estabelece que a Organización do Tratado do Atlántico Norte “para os Estados que son membros desta organización, continúa a ser o fundamento da súa defensa colectiva e a instancia apropiada para a concretizar”.

C) A POSICIÓN DO BNG: A DEFENSA DUN MODELO DE CONSTRUCIÓN EUROPEA ALTERNATIVO.

En coherencia co seu programa estratéxico e o seu proxecto nacional, o BNG propugna unha Unión Europea defensora dunha política que preserve a democracia, a economía sustentábel como obxectivo, a sociedade do benestar como elemento de xustiza social e a relación en pe de igualdade entre os gobernos nacionais como expresión das demandas dos pobos. Unha democracia que afortale a capacidade de control e impulso das institucións elixidas democraticamente, respectando as competencias dos Parlamentos nacionais, entre eles o Parlamento de Galiza, incrementando a transparencia na toma de decisións, e corrixindo o déficit democrático existente nas institucións da Unión Europea.
O BNG defende unha Unión Europea participativa, plenamente democrática, baseada na integración e non na exclusión, como conxunto e suma das identidades nacionais e do respecto á pluralidade económica, cultural e lingüística. Unha Unión Europea dotada de mecanismos e garantías de participación política, baseada na paz, na defensa do medio ambiente e no dereito ao traballo digno. Unha Unión Europea dos pobos, na que se recoñezan os dereitos de Galiza como nación. Unha Unión Europea política, social e cultural, e non só económica e monetaria.
En síntese, é hora de mudar o curso do proceso europeo, de pór a economía ao servizo das persoas, de atopar un encadre no continente para as nacións sen estado, de artellar estratexias que contribúan a construír un mundo multipolar, de espertar esperanzas. Non se trata dunha mera construción doutrinal. Ao pobo galego, á maioría social de Europa e do mundo, vailles a vida nisto, por todo isto, o BNG non pode apoiar a ratificación do Tratado de Lisboa porque non contribúe á construcción desa Europa pola que traballamos.

Contaminación no Río Eume: Onde está a Concellaría socialista de Medio Ambiente?

2008-06-26T13:46:00.007+01:00

O BNG urxe unha acción que evite a degradacion do río Eume e lembra que existen informes que alertan do seu estado desde 2007.

O deputado Fernando Blanco apunta á existencia de datos sobre a contaminación do Eume e o Chamoselo e quer saber por que se ignoraron.

O deputado do BNG Fernando Blanco Parga urxe unha actuación decidida para evitar a degradación dos ríos Eume e Chamoselo (afluente do Eume no seu paso pola Pontes) e apunta á existencia de datos que confirmaban o seu mal estado desde hai máis de un ano.

Tal e como indica o parlamentar, o BNG xa ten rexistrado unha pergunta no Parlamento en maio deste ano na que subliñaba a existencia de un informe elaborado por un laboratorio privado a instancias do BNG das Pontes sobre a situación deste río.

A análise do Chamoselo en tres pontos diferentes indicaba que non cumpría cos niveis esixidos para augas tipo A1 (nivel máis restritivo dos que miden as augas destinadas ao consumo human) en dous dos tres tramos analizados. Segundo este informe, elaborado en maio do ano pasado, as augas do Chamoselo e o Eume estarían en mal estado para a vida dos peixes, de tal xeito que non cubrirían as condicións necesarias para os tipos S nin C (augas salmonícolas e ciprinícolas).

O parlamentar nacionalista fixo tamén na semana pasada unha pergunta parlamentar sobre o verquido que apareceu no río Eume na zona coñecida como Cañotas e perguntaba polas posíbeis medidas correctoras desta situación.

O BNG non entende como se puido manter esta pasividade ante unha situación de degradación dos ríos constatada por informes en poder da Administración Pública e urxe unha acción decidida para frear os verquidos continuados nesta zona.

Desde Galiza Nova Pontedeume instamos á Concellaría de Medio Ambiente a que saia do silencio e da inoperancia que vén manifestando e comece a executar as medidas oportunas para o saneamento do noso río e instamos, ademais, a que actúe sobre os responsábeis do verquido.

Arrincan os actos para conmemorar o día da Patria Galega!

2008-06-09T18:10:00.015+01:00

O BNG centrará a súa actividade do próximo mes e medio nos 200 actos e mitins que compoñen a campaña 'Cremos no noso país', para lograr convocar a "maior mobilización do nacionalismo" na festividade do Día da Patria, que se celebra o 25 de xullo e que acollerá a tradicional manifestación en Santiago de Compostela.

"Pretendemos provocar unha grandísima mobilización para explicar cal foi a acción de goberno e a súa conexión co proxecto político do BNG", proclamou o voceiro nacional da organización frentista, Anxo Quintana, na presentación da campaña, na que traballan unhas 500 persoas para a súa organización, e que incluirá os "clásicos mitins, conferencias, debates e actos culturais".

Anxo Quintana estableceu que esta campaña, que se inicia este sábado en Santiago cun mitin, será "o terceiro estadio que ten que levar ao nacionalismo á etapa final".

En concreto, referiuse ás pasadas eleccións municipais, nas que o BNG conseguiu "a súa maior representación institucional"; e ás xerais, "nas que o Bloque resistiu e avanzou" fronte ás outras forzas nacionalistas do Estado, e augurou que estes "éxitos" irán acompañados do "desta convocatoria" (do 25 de xullo).

Estes son algúns dos actos que están xa programados:

--Narón: Xoves 12, ás 20.30. Con Teresa Táboas, Francisco Jorquera e Pablo Villamar. No Auditorio Municipal.

--Cariño: Venres 13, ás 20.00 no Auditorio Municipal. Con Carlos Aymerich, Ana Luísa Bouza e Manuel Varela.

--Abegondo: Venres 13, ás 20.30. Falarán Mario López Rico, Encarna Otero e Vítor González Meizoso.
--Catoira: Venres 13, ás 21.00. Interveñen Alfredo Suárez Canal, Carme da Silva e Nando Casal.

--A Guarda: Mércores 18, ás 20.30, no Centro Cultural. Falarán Carlos Aymerich, Carme Adán e Xosé Manuel Méndez.

--Culleredo: Mércores 18, ás 20.30, no edificio de servizos múltiples do Burgo. Interveñen Xosé Luís Barcia, María Xosé Bravo e Raquel Jabares.

--Mugardos: Xoves 19, ás 20.00, no Centro Cívico. Falarán Xoán Carlos Bascuas, Ana Pontón e Xosé Fernández Barcia.

--Cedeira: Xoves 19, ás 20.30, no Auditorio Municipal. Con Teresa Táboas, Manuel Parga e Alfredo do Río.

--Dodro: Venres 20, ás 20.30. Falarán Alfredo Suárez Canal e Rosario Fernández Velho.

--Sanxenxo: Venres 20, ás 20.30 no Porto deportivo. Con Anxo Quintana, Montse Prado e Roberto Fernández Lores.

Desde Galiza Nova Pontedeume queremos convidarvos á participación nos actos que tanto o BNG como Galiza Nova celebrarán para conmemorar o día da Patria Galega.

Súmate!

ENCE, nas Pontes? NON!!!

2008-05-28T17:09:00.000+01:00

Sen dúbida, un dos temas de actualidade que máis debate está a xerar é o traslado de Ence (actualmente en Pontevedra) e a súa hipotética ubicación no Concello das Pontes.

Galiza Nova de Pontedeume quere participar deste debate, mais faino para expresar, como xa fixo con clareza e firmeza o grupo municipal do BNG, que nos opoñemos e opoñeremos a tal acontecemento con todos os nosos medios e con todas as nosas forzas.

Polo de agora, desde a alcaldía das Pontes, desde a de Ferrol, desde a Consellería de Medio Ambiente..., déronse razóns a prol da ubicación nese Concello do complexo pasteiro. Agora imos dar nós as razóns que nos moven a rexeitar a consumación desta tentativa:

--Consideramos unha hipoteca medioambiental e unha "voadura controlada" para o Parque Natural das Fragas do Eume, o río Eume e a Ría de Ares-Betanzos.

--Non pode ser de recibo que as nosas máximas autoridades en materia de medio ambiente estean a defender tan alegremente e a promover de xeito descarado un proxecto como este, obviando que o Parque Natural do Eume é un dos poucos restos de ecosistemas representativos da biodiversidade atlántica europea.

--Debemos camiñar -e nós así o esixiremos!- cara á recuperación dun río como o Eume que era un monumento natural e que ten grandes posibilidades polos valores ecolóxicos que atesoura; por certo, do que tamén bebemos a auga día a día.

--Ademais, debemos recuperar unha ría moi degradada, entre outras cousas, precisamente polos verquidos dos restos da mina, e que pode volver a ser fonte de riqueza no futuro como xa foi no pasado.

Aínda que só fosen especulacións, o debate está aberto e as posturas están claras. Agardamos que a decisión que tome o Goberno galego e as forzas políticas que o sustentan sexa tomada con criterio e sensatez. Se así non for, desde Galiza Nova Pontedeume non imos quedar parados!

"Polo dereito a vivirmos en galego!". Estiveches con nós?

2008-05-22T16:56:00.000+01:00

Desde Galiza Nova Pontedeume queremos compartir con todos/as vós este vídeo da Manifestación do día 18 en Compostela que tiña por lema "Polo dereito a vivirmos en galego" na cal se quería deixar constancia da reivindicación que os/as galegos/as temos a usar o noso idioma e queremos que estes dereitos sexan respectados en todos os ámbitos e situacións da nosa vida. Esta manifestación foi seguida por 25.000 persoas e apoiada por case 500 organizacións e asociacións do país, entre elas, obviamente, Galiza Nova.

Por iso, tanto se estiveches na manifestación coma se non, disfruta do vídeo:

Na Galiza en GALEGO!!!

Galiza Nova Pontedeume "Polo dereito a vivirmos en galego"

2008-05-19T08:29:00.000+01:00

Galiza Nova Pontedeume estivo presente na manifestación que convocaba A Mesa pola Normalización Lingüística no día 18 de maio ás 12 horas en Compostela baixo o lema "Polo dereito a vivirmos en galego"

A manifestación partiu da Alameda e rematou na praza da Quintana onde Carlos Callón, presidente de A Mesa pola Normalización Lingüística, leu o manifesto que daba pé á manifestación.

Ademais, a manifestación contou co apoio de multitude de organización, asociacións, agrupacións culturais, concellos... e según datos de A Mesa pola Normalización Lingüística foi seguida por 25.000 persoas.

Sen dúbida, onte, hoxe e os 365 días do ano loitaremos "Polo dereito a vivirmos en galego".

Campaña de Galiza Nova Pontedeume sobre a Lingua

2008-05-19T08:03:00.001+01:00

Como ben observaredes, Galiza Nova de Pontedeume e Cabanas vén de realizar unha pegada de cartaces polas dúas vilas que se insire dentro da Campaña de Lingua que Galiza Nova está a desenvolver en todo o país.

Mais, a actividade da nosa organización nestas dúas vilas non ficou aquí. Fíxose un reparto de follas voandeiras, autocolantes e crachas nos dous institutos de Pontedeume nos que tamén se convidaba a participar da manifestación do día 18 de maio ás 12 horas na Alameda de Compostela.

Alén disto, Galiza Nova Pontedeume-Cabanas realizou un mural en Pontedeume baixo o lema "Pontedeume en galego! Temos dereito" do que poderedes ver fotos en breve.

1000 primaveras máis para o galego!!

Iniciativas do BNG contra a suba das taxas

2008-05-15T08:33:00.000+01:00

O BNG presentou a instancia dos CAF (agora Comités) sendas preguntas no Congreso dos Deputados e no Parlamento galego, referidas a diversos aspectos da suba das taxas universitarias. Na que se dirixiu ao Congreso solicítase entre outras cousas que se dea resposta a cuestións coma se dada a situación de recesión económica e os elevados índices de inflación o Goberno vai suprimir a obriga de incrementar as taxas académicas para o curso 2008-2009, de xeito que as CC.AA poidan conxelar os prezos académicos. Así mesmo, tamén se interpela ao Goberno para que transfira absolutamente esta materia ás CC.AA. Na pregunta presentada ante o Parlamento galego o BNG pide que se informe de en que punto está a elaboración do Decreto de Prezos públicos para o curso 2008-2009, e se a Consellaria de Educación e Ordenamento Univesitario vai negocialo con algunha organización estudantil. Tamén se pregunta se se vai ter en conta o nível salarial e de rendimentos en Galiza á hora de calcular as novas taxas.

Galiza Nova e a nosa lingua

2008-05-14T18:14:00.000+01:00

Como xa sabedes, Galiza Nova está a desenvolver en todo o país unha campaña sobre a nosa lingua, por iso gostariamos de compartir con vós este tesmuño visual no que se dá conta de grande parte da mobilización e traballo que a nosa organización ten desenvolvido en prol da plena normalización do noso idioma. Recollendo as palabras de Castelao, nas que dicía que "se aínda somos galegos é por obra e graza do idioma" cobra especial importancia que todas e todos vos acudades o domingo 18 de maio ás 12 horas á Alameda de Santiago de Compostela xa que alí deixaremos constancia do noso "dereito a vivirmos en galego".

Galiza Nova Pontedeume estará alí, e ti?

Nace a Nova Organización do Estudantado Galego: Comités

2008-05-14T13:42:00.000+01:00

O sábado, 10 de maio, celebrouse na cidade da Coruña a Asemblea Nacional Constituínte da Nova Organización do Estudantado Galego baixo o lema "Organizando o estudantado de hoxe para a Galiza de mañá". Esta nova organización levará por nome Comités.

Esta iniciativa parte das organizacións estudantís maioritarias do estudantado galego, con presenza nos sete campus da nación, os CAF (Comités Abertos de Faculdade) e os CAE (Comités Abertos de Estudantes) que se uniron nunha soa forza, agrupando, deste xeito, a estudantes do ensino medio e do ensino universitario

Desde Galiza Nova, representada na clausura desta Asemblea pola súa Secretaria Xeral Iria Aboi, deixouse constancia do importante desta data, así como do grande e activo papel que tiveran xogado os CAF e os CAE nas aulas dos sete campus galegos, papel que de seguro recollen os recén nados Comités para seguir loitando por un ensino público, galego, democrático e de calidade.

Adiante Comités!!

Constitúese o grupo de traballo da Mesa pola Normalización Lingüística no Baixo Eume

2008-05-14T12:59:00.000+01:00

Vén de se crear na nosa vila o novo grupo de traballo comarcal que agrupa as socias e socios dos concellos de Cabanas e Pontedeume, así como a todas as persoas que, sen seren socias da Mesa pola Normalización Lingüística, quixeren botar unha man.

Nesta asemblea aberta falouse da situación do idioma galego que na nosa zona, asemade, tamén serviu para anunciar publicamente a constitución formal dun grupo de traballo estábel da asociación en defensa da lingua na zona do Baixo Eume. Esta novo colectivo comarcal agrupará as socias e socios dos concellos de Pontedeume e Cabanas, até o de agora integrados na zona organizativa de Ferrol. A creación dun grupo estábel da Mesa na zona do Baixo Eume vénse organizando desde hai uns meses e parte do interese por constituír unha estrutura organizativa permanente no tempo por parte de varias das socias e socios que a organización cívica ten en Cabanas e Pontedeume.

Para os membros da nova delegación da Mesa “trátase de combinar actividades de denuncia e conscienciación social sobre situacións concretas que, arredor da lingua, teñen lugar a nivel local e comarcal” e, asemade, “trasladar á zona do Baixo Eume e desenvolver as campañas e iniciativas nacionais que a organización poña en marcha en cada momento”. Desde A Mesa do Baixo Eume propóñense tamén “colaborar estreitamente con entidades e colectivos que, desde o traballo no ámbito cultural ou desde outros espazos, están comprometidos co galego na nosa zona”. Aliás, anuncian tamén que colaborarán en todo momento cos grupos comarcais da Mesa próximos das zonas de Ferrol e As Pontes de García Rodríguez, “pondo en marcha, cando sexa preciso, iniciativas conxuntas”.

Alén diso, este grupo de traballo xa comezou a desenvolver a súa actividade traballando na difusión da Manifestación que ten como lema "Polo dereito a vivirmos en galego" que terá lugar o domingo 18 ás 12 horas na Alameda de Santiago de Compostela.

Ademais, lembrámosvos que todo ou toda aquel que estiver interesado en ir á Manifestación ten un bus (de balde) que pasará por Pontedeume.

Animádevos!! Polo dereito a vivirmos en galego!!

Atrévete en galego!

2008-05-13T17:49:00.000+01:00

Galiza Nova ven de pór en marcha unha campaña a nível nacional sobre o galego, baixo o lema: "Por que lle tes medo ao galego? Atrévete!"

Un ano máis chega o día das Letras Galegas e moitas institucións, medios de comunicación e mesmo a nível social, económico, político e cultural e moitos e moitas lembran que en Galiza existe unha lingua propia e deciden adicarlle un espazo, tratándoa coma unha reliquia que non merece máis ca unha mención nese día nos medios de comunicación ou noutros ámbitos de onde fica totalmente ausente o resto do ano.

Que pasa coas lectoras e lectores galegofalantes que temos dereito á información na lingua de noso? Que pasa cando queremos estudar en galego? Que pasa cando queremos ver cinema en galego? Que pasa cando uns pais queren educar ás súas fillas e fillos na lingua propia? Que pasa cando calquera de nós quere dirixirse na nosa lingua á administración galega ou estatal con sede en Galiza?

Estas preguntas son o exemplo de que a día de hoxe vivimos nun país no que non se garante o dereito a poder desenvolver a nosa vida integramente e con naturalidade en galego. A raquítica lexislación a respecto da lingua fica totalmente incumprida na maioría dos casos e as e os galegofalantes vense desprezados e obrigados a esixir o respecto polos nosos dereitos lingüísticos ou a facer uso do español para axilizar determinados trámites coma un casamento, a realización de exames sen opción en galego para traballar en empresas coma Correos...

Por moito que na Carta Europea das Linguas ou na Constitución Española se recolle que ningunha persoa será discriminada por razón de lingua o certo é que tódolos días no noso país coñecemos casos de discriminación polo uso do galego. Malia que nos últimos naos se tivese avanzado na aprobación de leis que camiñaran cara a normalización do noso idioma a realidade é que son poucos os mecanismos que se veñan articulado para que se leven á práctica e é pouca a vontade política de quen ten a responsabilidade de efectivizalas e velar polo seu cumprimento. Despois do cambio de goberno na Xunta do Partido Popular seguimos sen visualizar un compromiso claro de non repetir os erros da anterior política lingüística pro parte do PSOE na Dirección Xeral de Política Lingüística que é o departamento competente para impulsa-la normalización do galego. Consideramos que a aprobación de decretos como o Decreto do uso da lingua galega no ensino 124/2007 son positivos pero non son suficientes, pois o cumprimento de que no ensino secundario se imparta como mínimo a metade do horario lectivo en galego dista moito de ser realidade na práctica totalidade dos centros de ensino. Medidas como a creación das Galescolas para a escolarización en galego de nenas e nenos de 0-3 anos ou outras iniciativas impulsadas polo BNG deben ser o camiño a seguir para o impulso do galego dende as administracións públicas.

Dende Galiza Nova, organización xuvenil do BNG, sempre defendimos o nosos dereito a poder desenvolve-la nosa vida en galego e reivindicamos o dereito de todas e todos os galegos a utiliza-la nosa lingua en calquera ámbito sen ningunha traba ou discriminación, no ensino, no lecer, no traballo, no deporte, nos medios de comunicación, na rede... Por iso, convidámoste a que participes connosco deste obxectivo porque o mellor xeito de contribuír á normalización da nosa lingua a nível colectivo é tamén o compromiso de cada un de nós a nível individual durante tódolos días do ano, utilizando o glaego de xeito consciente e esixindo o cumprimento da lexislación para a súa normalización. Xa que logo, animámoste a que te sumes a nós.

Atrévete coa nosa lingua. Na Galiza, sempre en galego!

MANIFESTACIÓN

"Polo dereito a vivirmos en galego"
Domingo 18 ás 12 na Alameda de Santiago de Compostela

Anímate a vir! Se queredes acudir poñédevos en contacto con nós xa que haberá un bus de balde desde Pontedeume!

Botamos andar!

2008-05-13T16:44:00.000+01:00

Galiza Nova, a organización xuvenil nacionalista maioritaria, bota andar nunha nova etapa coas forzas renovadas e unha chea de proxectos que queremos achegar á mocidade da nosa vila.

Como nacionalistas, queremos traballar para acadar a soberanía nacional desde o noso propio concello porque entendemos que a solución dos problemas de Galiza, e polo tanto de Pontedeume, pasan porque o noso pobo poida ser dono de si mesmo e do seu futuro.

Como mozas e mozos, sabemos que a mocidade é un dos sectores que máis ataques sofre: prexuízos, criminalización, traballo e ensino precarios, servizos de transporte insuficientes, represión lingüística... É por isto que se fai máis necesario do que nunca que a mocidade se autoorganice e loite por conseguir un futuro propio e colectivo mellor dentro dunha Galiza soberana.

Aproveitando as vantaxes que nos ofrecen as novas tecnoloxías abrimos este blog, co obxectivo de espallar as nosas iniciativas e actividades mais tamén nos gustaría que expresásedes as vosas ideas, comentarios ou suxestións sobre todo aquilo que vos interese.

Sen máis, GALIZA NOVA PONTEDEUME bota andar!